GLOQOWE’JI’J GWILUT UGJIT NUELEWIMGEWEI MITI’S

Teget pesaq ta’n telamu’g gujm. Ge lapa’si, pesaq nige’. ‘Nmu’j telwisit Ali’, Elisapet telimatl ugti’l, “Weliaq ta’n telnasgugg metu’na’qawe’g ‘mg’sng.” Al’s wapus aqq Lui gajuewj esgipa’tiji witapua Elisapet aqq Ali’ ‘nmu’j. “Apigtang’tt welpit miti’s”,  teluet Elisapet. Al’s aqq Lui gisapu’smi’tij p’tewei. Esamuqoltijig ‘ms’t. Ge’gwe’g wejiniso’tu’titl amallugwaqann ugjit miti’s nuelewimgewei. ‘Ms’t waqampisultijig gegno’tla’tij miti’sl. Mawlugutijig ‘ms’t muta mesgi’g lugowaqan amallugwaluj miti’s nuelewimgewei, aqq wegla wesgowita’jig, e’pite’ji’j, ‘nmu’j, gajuewj aqq wapus, ‘ms’t piltu’lugutijig. ‘Ms’t ginita’jig. Pe’l Lui wett’gl sisla’gwa’tas’gl piesgmine’l ‘sginminn. “Lui, punajo’te’n negla”, teluet Elisapet. Ta’n tujiw gaqiamallugwala’tij wegla nuelewimgewe’l miti’sl, na nuta’titl gloqowe’ji’jl ugjit g’p’ta’q miti’sigtug. “Ni’n najigwilua’s newte’jit”, teluet Elisapet. Na Elisapet poqtasunteget wastewigtug. Na weltesguatl e’pijji’jl, pas’g mu geggunagul negm gloqowejl, gatu esmaj newte’ galgunawe’ji’j. Elisapet weniet ugtawti nipugtug. Gatu ula jipji’j gegnua’tuaj ta’n giasgiw tltesgewetew. Aqq elg negm mu geggunagul gloqowejl. Na jijuaqa Elisapet miguapt’g pitalqeg aqq smtug najipa’qamajo’teget. “Alo’! Eig wen lame’g?” pipanigesit Elisapet. Newtunemi’gl ugpugugul pantetesgl; app igtig, app igtigl wijei, glapis ugtejgewei na’nijig wapultijig. Na te’sisnig gu’gu’gwesg pisultisnig lame’g pitalqeg. “Mu gilew geggunawoq gloqowej ugjit ni’n?” pipanigesit Elisapet. “Moqwa’, moqwa’, mu gloqowej epigw tett” telua’tijig wegla na’nijig gu’gu’gwesg. Mu negmow sespetelma’tigul gloqowejl, na pas’g getu’ ne’p’tijig. Na jijuaqa a’suguatl gisigu’ji’nmul megwegna’mlitl toqo wigewit aqq wapi’tuat. Smtug migwitelmaji witapa wi’sisji’jg ‘nmu’j, wapus aqq gajuewj. Telimatl gisigu’l, “Mu ninen geggunaq’t gloqowej ugjit ‘ntmiti’sminen nuelewimgewei.” Gisigu’ji’nm teluet, “Ula munti alawlatm, etug jel lame’g pisit gloqowe’ji’j, pe’l apujqo’tunej.” Wesgewe’g gisigu’ji’nm aqq sesgwe’ji’jit. “Ula newte’jit epit!” Gi’nujing Elisapet pemaptoq wastewigtug. Wesgewigwetutg aqq gloqowe’ji’jl musigisgnatl. “Na,” telua’tijig ‘ms’t, e’pite’ji’j Elisapet, wapus Al’s, gajuewj Lui aqq ‘nmu’j Ali’. “Mujgajewei lugowaqan gisa’tu’g aqq welgnesit ‘gtmiti’sminu!”