Pegn'g

Ta'n tujiw Sutig nisa'siteg ugjit egsitpu'gowei, mesgilg galguneweio'q ge 'gupip patawtigtug.
Na aputasga'latl gatu mu goqwei tewaqja'qtnug.

Na elqanateg taqamatl, me' mu goqwei tewaqja'qtnug. Glapis aputasga'latl galguneweio'ql unjig aq pu'tamatl.

Na tujiw natgoqwei maqtawapsge'ji'jg tewaqja'q, migute'j ugsisqoneg, toqo taqmoqipqamig patawtigtug.

Sutig teluet, "Goqwei ta na."
Uggwijl teluenitl, " Goqwei ta na."
Na tujiw maqtawapsge'ji'jg malqumuatl ugjijaqamijl Sutigal aq poqjigwet.

Toqo Sutigal uggwijl ugjijaqamijl malqutmuatl aq me' pemgilg.

Maqtawapsge'ji'jg malqutg wisawoqsewemgewei ugtjijaqamiju'aqam aq me' pemgilg.

"Telte'tm na Pegn'g", Sutig teluet.

Glapis nige' Pegn'g telgilg 'st'ge' wisawoqsewemgewei.

Sutig ujjl pisgwa'nitl aq teluet, "Eii, goqwei ta na?"

Sutig teluet, "Pegn'g na. Malqumaji ugjijaqamijg. “

Sutig ujjl megnatl Pegn'gal aq tewapega'latl tuo'p'tigtug.

Pegn'g paqiagweitesing aq nmiapuipgwetesingaq, POING, POING, POING awtigtug.

Pegn'g pugwelamaji mjijaqamijg aq malqumaji.

Pegn'g pugwelamaji tmogtang ugjijagamijg ag malqumaji.

Pegn'g nemitoqol wenji'guo'me'I ugjijaqamijg aq malqumaji.

Pegn'g je we'gaw nemiaji mimigese'g ugjijaqamijg aq malqumaji.

Nige' Pegn'g telgilg 'st'ge' espaqamigeg. Na apaja'sit Sutigeg, pemgopa'sit poqasunigtug aq nepat.

Ta'n telgi'g iga'taqan telioqonitpa'q aq Sutig mu gis tu'wegw aq najimila'sigw.

Sutig ungi'gug teluejig, "Goqwei ta na?" Tewattugwi'gig aq ejigltesgua'titl Pegn'gal.

Gatu tel mamun oqonitpa'q na gesga'jig. Je mu gisi we'jitutigw ga'qan ta'n teli apajipisgwa'titaq.

Sutig tewjigwaig. Na nemiatl Pegn'gal mu malqutmug mutputiei ugjijagamiju'aq.

na menipga'toq mussew aq tewasga'toq tuop'tigtug.

Sesgwet, "Mijipjewei" Pegn'g nisapegig wenjiguomg aq tepunaqietl ugjijagamijl.

Na Sutig sewisga'latl ugjijaqamijl aq i'mussal pijo'latl galguneweio'qigtug. Na smtug Pegn'g pisgwaqsing tuo'p'tigtug aq pijiwnaqieg galguneweio'qigtug ugjit malquman ugjijaqamijl.

Ta'n telinqase'g Pegn'g lamugwomg eig, Sutig gepjoqa'latl galguneweio'ql. Gepjoqpilatl, ugjoqje'gna'latl. Gaqioqa'latl. Aq a'papigtug gelpilatl.

Aq 'ms't witapaq apoqonmaji elapila'titl aq pijege'titl mjegeio'qigtug.
Na uggwijl aq ujjl natgitmi'tij mjegeiulgw. Mjegeiulgw iga'q aq ejigla'tija'latl Pegn'gal.

Aq mu apaja'sigwaq nugu'.

Ta’n te'sijig ugjijagamijg wesua'tu'tij agantie’wuti ugjit apajigutnew.