Isag aqq Susan nagalujig nipugtug

Ula na Isag aqq Susan. Ujjual gis minu maliewilitl. Epit mu gesalagwi mijuajijig. Isag gis nutuatl epinitl telueniteg, “Nipugtug lalatesnu Isag aqq Susan. Natel nagalatesnu.” Nige gitg jipasijig.

Na welagweg, g’s’talititeg. Na gegnotlujig. Gesgmnag maitatigw na Isag pitgmatgl ugmaposml guntajl. Ges pemitatij, na Isag i ngute nisegej guntaj. Nipugtug pegisuluteg na wesmugtujig. Pas na geitutip ta’n tli apaji nmatitag. Negaw majuggwatmititl guntajl ta’n Isag nisegepnn. Igtig welagweg, app apajalujig nipugtug. Na tujiw Isag mu gis pitgmatmugul ugmaposml. Nutaiw majalujig. Nipugtug pegisuluteg app wesmugtujig. Isag aqq Susan mu geitutigw ta’n tli nmatitag. Amujpa siawagatgig nipugtug. Newtitpag nipugtug eigig. Egsitpug tugwietig na pogji gwilmitij awtij ta’n elteg wiguowag. Mu wejiguomjij. Gesgajig aqq gewisingGes pematitij, na wejitutij wenjiguomjij. Welamig wenjiguomjij. Puowin na wiguow. Puowin nemiaji Isagal aqq Susanal. Na pisgwigimaji. Weleiwaji aqq welsmaji Isag aqq Susan mu gejiatigul ula gisiguisgwal na puowin aqq mu welm’tug. Na Isagal apt’sgatl lagapigtug. Mu pualagul ugsmagwalin. Susan tesisgisg’g elatuaj mijipjewei. Gimi agnutmajig ta’n tli ugsmugwatag. Newtejgeg nagweg Puowin telimatl Susanal, “Mawsategewi.” Susan telimatl, “ Mu nin nata mawsagtegew.” Puowin musgatuatl Susanal ta’n tel mawsategemg. Ta’n tujiw Puowin nisagwasiteg gigjiw epsagtejgigtug, na Susan piji gsmegetl pugtewigtug aqq igtegej gagn. Nepgag Puowiog. Na Susan gwilg apt’sgaign. Wejitog aqq eliet lagapigtug. Na pansag gagn ta’n Isag pisij. Gesgmnag majatitigw na apujgotasijig. Na wejitutij wisaw suliewei aqq majatijig. Isag aqq Susan nespnmitij suliewei ta’n wejitutip. Ges pematitij na pegisingig gospemjij. Natel pemgopatijig aqq atlasmijig. Ges pemgopitij na apjijgmuj neiasit. Na tepatijig apjijgmuj ugpagamg aqq tagmogwalujig gospemg. Gamatgug pegisuluj na Isag nemitog awtij ta’n wiguag elteg. Glapis gatu pegisingig wiguag. Ujjual weltasilitl. Epitag gis sag ejiglasisnag ta’n mu gesalagupni mijuajijg. Isag aqq Susan weltasijig wiguag pegisinitij. Wejategemgeg mawgatmutijig nesisijig aqq weloltijig.