Tuma Aligew Gesigewe’m

Newtejgeg na’gwe’g Tuma uggwitl weja’tat’p pilei gesigewei aligew. Ta’n tujiw Tuma nemito’q smtug aluapt’g aq teluet “Mu welaptmu aq ma’ nasgmu”. Tuma uggwijl teluelitl, “Gjittesnu”. Gtig na’gwe’g, uggwijl telimtl, “Ge’ nasa’tu na gesigeweim aligew taliulm’tu’n. “ Tuma teluet, “Moqwa’”. Uggwijl ‘lpa i’unaqielitl aq telimtl, “Tuma nasa’tu na gesigeweim aligew.” Tuma teluet, “Moqwa’” Na uggwijl newtapjasualtl toqo wesua’toq gesigewei aligew aq gi’gajinasa’tuaj. Ta’n tujiw jentesgeg, na Tuma nasg’g ugtaligewm gesigewei. Na Tuma eliet gina’muo’guomg aq gaqapija’toq ugtaligewm gesigewei. Ta’n tujiw tele’g ugjit tuita’new na ms’t maljewe’jg jaqalignita’jig aq tewtugultijig. Pas mu Tuma. Nujigina’mueti’sgw angamatl Tumaal aq telimatl, “Tali ulm’tu’n, ge nasa’tu na gtaligewm gesigewei.” Tuma teluet, “Moqwa’” Nujigina’mueti’sgw i’unaqiet aq teluet, “Tuma, nasa’tu na gesigewei aligew.” Aq Tuma teluet, “Moqwa’”. Na nujigina’mueti’sgw newtapja’sualatl toqo wesua’toq gesigewei aligew aq gi’gajinasa’tuaj. Ta’n tujiw jentesgeg, na nujigina’mueti’sgw nasgmuap Tumaal ugtaligewm gesigewei aq Tuma magota’qap. Ta’n tujiw nujigina’mueti’sgw nemisiteg ta’n telpisij, gi’s ap newtapja’sualatl Tumaal aq wejo’tg gisi apajinaso’tuan ugtaligam gesigewei. Ta’n tujiw jentesgeg, na utapsunuow mawapsg’piteg msaqtaqtug aq Tuma aq nujigina’mueti’sgw alpuguijig pas’g nasgmi’titl lame’g elgm’gewe’l. Tetapu gaqan pana’s’g aq pisgupugua’sit Niganpuguit. Nujigina’muetisgw teluet, “Na Tuma mu getu nasa’tug gesigeweim aligew.” Na Niganpuguit gaqawiangamatl Tumaal aq telimatl, “nasa’tu na gesigeweim aligew.” Aq Tuma teluet, “Moqwa’”. Toqo nige’ Niganpuguit toqapja’sualaji Tumaal aq Nujigina’mueti’sgwal aq wejo’tg gisiapajigno’tlan. Ta’n tujiw gaqa’tegeteg na Niganpuguit nasgmuap Nujigina’mueti’sgwal ugtoqon aq Nujigina’mueti’sgw nasgmuap Niganpuguilitl ugtapsun aq Tuma me’ wejgupuguip pas nasg’gl lame’g elgmgewe’l. Weli amase’ji’jg miliasuaqane’gatig na’tuen metewsesgwet, “Tuma, jugu’wa aq najimila’si.” Tuma taqmoqtuwi’g lamuguom aq nasegej ugtgesigeweim aligew, nasoqtesguaji umugsng aq tewattugwi’g. Niganpuguit elapa’sitl Nujigina’mueti’sgwal aq telimatl, ”Eii, nasgmuin nutapsun aq smtug mna’tu.” Nujiginamueti’sgw telimatl, “O ntoqon nasgmuin. Gi’l tmg mna’tu na ntoqon.” Na gi’gaja’tijig aq gi’gaja’tijig gatu mu wen tapusi’tij getu’ nigan sa’sewgna’sigw. Glapis, Tuma apimila’sit. Angamaji Nujigina’mueti’sgwal aq Niganpuguilitl. Toqapja’sualaji aq ta’n tujiw jentesgeg na Tuma gaqgno’tlatgi’. Igtigeg na’gwe’g, Niganpuguit puna’toq ugtlugowaqan aq eliwsitaq tp’te’snug, ta’n tett mu wen nasgmug gesigewei aligew.